រាជធានីភ្នំពេញ៖ នារសៀលថ្ងៃពុធ ៤កើត ខែជេស្ឋ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២០ ខែឧសភា ឆ្នាំ២០២៦ នៅមន្ទីរពេទ្យមិត្តភាពកម្ពុជា-ចិន (ពេទ្យលោកសង្ឃ) ឯកឧត្តម ខូវ ឆាយ ប្រធានសហព័ន្ធកីឡាប្រដាល់គុនខ្មែរ រួមជាមួយអ្នកនាង សេង ម៉ូលីនី បានអញ្ជើញចុះសួរសុខទុក្ខ និងនាំយកថវិកាចំនួន ២០លានរៀល របស់
#សម្ដេចអគ្គមហាសេនាបតីតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនដល់កីឡាករ អ៊ួច ធារិទ្ធ ដើម្បីជួយសម្រួលដល់ជីវភាព និងការសម្រាកព្យាបាលជំងឺ។
យោងតាមការបញ្ជាក់ពីក្រុមគ្រូពេទ្យ កីឡាករ អ៊ួច ធារិទ្ធ កំពុងសម្រាកព្យាបាលបន្ទាប់ពីបានធ្វើការវះកាត់ឈាមកកក្នុងខួរក្បាល នៅមន្ទីរពេទ្យមិត្តភាពកម្ពុជា-ចិន (ពេទ្យលោកសង្ឃ) ដោយស្ថានភាពសុខភាពកំពុងទទួលបានការយកចិត្តទុកដាក់ពីក្រុមគ្រូពេទ្យជាបន្តបន្ទាប់។
ក្នុងឱកាសនោះ ឯកឧត្តម ខូវ ឆាយ ក៏បាននាំយកនូវការផ្ដាំផ្ញើសួរសុខទុក្ខពីសម្ដេចតេជោ និងសម្ដេចកិត្តិព្រឹទ្ធបណ្ឌិត ដោយបានជូនពរកីឡាករ អ៊ួច ធារិទ្ធ ឲ្យឆាប់ជាសះស្បើយពីជំងឺ មានសុខភាពរឹងមាំឡើងវិញ និងអាចវិលត្រឡប់ចូលរួមបន្តអភិវឌ្ឍវិស័យកីឡាប្រដាល់គុនខ្មែរ ឲ្យកាន់តែរីកចម្រើនទៅមុខទៀត។
ជាការឆ្លើយតប កីឡាករ អ៊ួច ធារិទ្ធ បានថ្លែងអំណរគុណយ៉ាងជ្រាលជ្រៅចំពោះសម្ដេចតេជោ និងសម្ដេចកិត្តិព្រឹទ្ធបណ្ឌិត ដែលតែងតែយកចិត្តទុកដាក់ចំពោះសុខទុក្ខរបស់កីឡាករ កីឡាការិនីគ្រប់រូប ជាពិសេសក្នុងគ្រាលំបាក។ ទន្ទឹមនឹងនេះ កីឡាកររូបនេះក៏បានគោរពជូនពរសម្ដេចទាំងទ្វេ សូមមានសុខភាពល្អ កម្លាំងមាំមួន និងគង់ជាម្លប់ដ៏ត្រជាក់ត្រជុំសម្រាប់ប្រជាពលរដ្ឋ និងកូនចៅគ្រប់ៗគ្នា ក្រោមម្លប់សុខសន្តិភាព និងការអភិវឌ្ឍជាបន្តបន្ទាប់៕
#អត្ថបទដោយ pct
