-ឯកឧត្តមអភិបាលខេត្តលើកទឹកចិត្ត
កងកម្លាំងទាំង៣ឱ្យបង្កើនសាមគ្គីភាពមន្ថែម ដើម្បីរួមគ្នាការការសន្តិសុខជាតិទាំងមូល
ខេត្តស្ទឹងត្រែង-ឯកឧត្តមអភិបាលខេត្តមានប្រសាសន៍ចាត់ទុកស្មារតីលះបង់និងការទទួលខុស
ត្រូវខ្ពស់របស់កងកម្លាំងប្រដាប់អាវុធទាំង៣ប្រភេទ ព្រមទាំងមន្ត្រីពន្ធធានាគារខេត្តផង ជាការបំពេញភារកិច្ចយ៉ាងសកម្មក្នុងការថែរក្សាសន្តិសុខសុវត្ថិភាពសណ្តាប់ធ្នាប់ សាធារណៈជូនបងប្អូនប្រជាពលរដ្ឋហើយបន្តរួមគ្នាបង្កើនសាមគ្គីភាពមន្ថែមទៀត ដើម្បីសន្តិសុខជាតិទាំងមូល។
ក្នុងពិធីសំណេះសំណាលនិងជួនអំណោយជាស្បៀងនិងថវិកា របស់រាជរដ្ឋភិបាល ជូនកងកម្លាំងប្រដាប់អាវុធទាំង៣ និងមន្ត្រីពន្ធធានាគារ ក្នុងឱកាសបុណ្យភ្ជុំបិណ្ឌ នៅខេត្តស្ទឹងត្រែង ថ្ងៃទី៧តុលា ឆ្នាំ២០២៦ ឯកឧត្តម សរ សុពុត្រា អភិបាលខេត្តមានប្រសាសន៍ថា កងកម្លាំងយើង ត្រូវបង្កើនសាមគ្គីភាពគ្នាឱ្យកាន់តែរឹងម៉ាំបន្ថែមទៀតដើម្បីថែរក្សាសន្តិសុខសាធារណៈឱ្យមាននិរន្តរភាពធ្វើឱ្យការរស់នៅរបស់ប្រជាពលរដ្ឋកាន់តែមានភាពសម្បូរសប្បាយប្រសើរឡើងថែមទៀត។
ជាមួយគ្នានេះឯកឧត្តមអភិបាលខេត្ត បានពាំនាំនូវប្រសាសន៍សួរសុខទុក្ខយ៉ាងកក់ក្តៅបំផុត ពីសំណាក់ សម្តេចអគ្គមហាសេនាបតីតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន, សម្តេចមហាបវរធិបតីហ៊ុនម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជចន្ទមុន្នី ជូនចំពោះកងកម្លាំងប្រដាប់អាវុធនិងមន្ត្រីពន្ធនាគារទាំងអស់ដែលតែងតែលះបង់កម្លាំងកាយកម្លាំងចិត្តដើម្បីជាតិមាតុភូមិនិងប្រជាជន។
លោកឧត្តមសេនីយត្រី តន ឆៃ មេបញ្ជាការតំបន់ប្រតិបត្តិការសឹករងខេត្តចាត់ទុកថា នេះជាការយកចិត្តទុកដាក់របស់រាជរដ្ឋាភិបាល ក៍ដូចជាថ្នាក់ដឹកនាំក្នុងខេត្តក្នុងឱកាសថ្ងៃ ឈប់សម្រាកនៃពិធីបុណ្យភ្ជុំបិណ្ឌផង ហើយកងកម្លាំងទាំងអស់សម្តែងការពេញចិត្ត ចំពោះការគិតគូដ៍តម្លៃមិនអាចកាត់ថ្លៃបាននេះ ។
សូមបញ្ជាក់ថា អំណោយដ៍ថ្លៃថ្លានេះពិតជាបានជួយសម្រាលការលំបាកក្នុងជីវភាពប្រចាំថ្ងៃ ជាពិសេសកងកម្លាំងប្រដាប់អាវុធដែលចូលនិវត្តមានជីវភាពខ្វះខាតទទួលបានស្បៀងអាហារនិងថវិកា នេះទៅបានជាកម្លាំងចលករមួយបន្ថែមក្នុងការបន្តដំណើរទៅមុខទៀតដើម្បីលើកកម្ពស់ជីវភាពរស់នៅប្រចាំថ្ងៃផងដែរ។
ដោយ÷ កុល សារត្ន័ សហការីរស្មីញូស៍ ប្រចាំខេត្តស្ទឹងត្រែង។
